أول أمبارح  حكتلي امي انه البيت بحتاج خبز , لبست (الشحاطة) حملت حالي وانا محروق من جوة ليش حكتلي انا أجيب الخبز , وليش مش أخوي الصغير.. المهم انزلت دخلت المخبز لقيت كم واحد سابقيني وطالبين …

حشرت حالي بين هالعالم وطلبت كيس خبر و (بوزت) وصرت استنى مثل هالعالم الي معي …  وبدون سابق انذار دخلت هالصبية الي "ما شاء الله عليها" .. شو لبس , شو شعر شو مشية … الله الله …يخزي العين .

قربت على الخباز وحكتلي "معلش كيس خبز" … (طلبت زي كيس خبز )… يا حظي انا …

المهم  ..الاخوان الي كانو موجودين في المخبز ( وعلمكم أكيد) الي كان مبوز والي كان بطلع بالأرض والي كان متنرفز ومعندوش وقت وملوع هالسيجارة… طبعا الحكي هاد كان كله قبل ما تفوت ست الحسن والجمال …

فاتت هالبنت من هون , وبلشت الأجواء في هالمخبز تتغير هالزلم(جمع زلمة)  بلشت تطلع بنص عين وبلش الشباب تروح يمين وتروح شمال ويعاينه بالبنت ويقيسه فيها… وسبحان الباري صار الكل يعرف الي بجنبه , الي صار ينكت هذيك النكت الي يعني (بتفرط من الضحك), والثاني فتح تلفون ,وهو مافي رصيد, وبلش يحكيلك عن ال business trip  الي بده يسويها خلال اليومين الجايين , والي صار يفتي في السياسة وكيف وضع البلد وطبعا شو الحلول السياسية الي لازم تسويها حكومتنا الرشيدة عشان الشعب (يتنغنغ)… بس البنت ما اطلعت ولا في واحد ….

الشباب( اتظايقت شوي).. الشب ابو business trip فكر البنت سمعها خفيف زي دمها ,   فعاود الاتصال وحكى عالتلفون نفس القصة  …بس صوته كان أعلى شوية… وتبع السياسة فكر  في الموضوع و حكى يمكن البنت ما بهمها السياسة خليني أفتح موضوع شبابي خليها تطلع, وبلش يحكي عن التلفونات ام نغمة أغاني وكيف اشترى موبايل جديد طخ وبقدر الواحد يحط أغنية بدل الرنة العادية من الموبايل… الزلمة شكله مش عارف انها الها مليون سنة الشغله هاي …!!!!   وطبعا ما بدي احكيلكم عن النسوان.. الي كانت تلوي ثمها , وتمتم عن البنت والله أعلم شو كانت تحكي ..وغيره وغيره

المهم اجا الخبز وبده يعطي أول طلبية وما تشوف عينك الا النور , وهالعالم تحلف على بعض انه انت اول لا والله انت اول … بس الخباز طلع احدق منهم, تركهم كلهم وراح عندها واعطاها الخبزات… البنت حملت حالها وراحت… والعيون تلحق فيها لحد ما طلعت … 

وعاد الصمت المطبق , ورجع الي كان يطلع في الحيط ,يطلع في الحيط. والي كان مستعجل , اتذكر انه مستعجل…

طبعا انا كنت غير الكل زي ما دخلت زي ما طلعت "ولا يهمني حاجه" , انت عارفني يا استاذ كامل نصيرات  :-)